香港REITs中的龍頭企業：領展(0823)，從來不是我杯茶，這隻基金上星期五宣布的一個大型、大折讓供股行動，可謂嚇驚小股民。對於這個向小股東伸手的舉措，我又忍唔住想講幾句。
大家投資領展，無非貪佢穩健，派息又算是吸引，不過這間公司近年所做的舉措，相信早已令好多小股東失望。
（這篇文章選輯自我們早前Patreon的內容，想閱讀更多最新投資分析，歡迎訂閱）
圖片來源：領展年報
1. 估值高
以前由於這隻”龍頭”太受歡迎，股價高令到估值不便宜，派息比對同類REITs略低。當然作為龍頭企業，大家都願意俾一個溢價佢，一般叫龍頭溢價。但近年股價表現唔多對版。
2. 穩健性減
公司近十多年以來不斷”轉型”，以前將商場大改造，令到資產價值提高，租金收入亦增加，股價水漲船高，不過多年前這招差不多用盡，能夠提升的商場越來越少。之後管理層改變策略，變賣資產，又跟發展商合作投資地產項目，同時又進軍中國內地及海外市場，依家又話去到發展3.0階段，其實穩健性已經比以前大打折扣。
以前屋邨商場跟民生息息相關，這類收租業務的經濟敏感度相對比較低，但轉型後不單經濟敏感度高咗，投資海外，近年美元強勁，單在滙價上它的資產值都縮水，都未講到內地經濟的情況。
圖：領展發展方向(資料來源：領展年報)
圖：領展投資組合(資料來源：領展年報)
3. 派息減
2022年下半年度開始減派息，2023年上半年度繼續減，收息股減派息自然唔係好事。
領展大供股小股民無奈
講番今次大供股，領展自2005年上市以來，宣布了首次供股行動，以 “5供1″方式進行供股集資，每基金單位認購價44.2元，較停牌前折讓29.6%，集資約188億元。所得資金大部份用於償還現有債務，部份作探索投資機遇，以及一般營運資本。預料供股集資後淨負債比率將降至不足20%。
今次有三大問題要討論：
1. 為何揀”供股”來集資？
供股的目標是集資籌錢，一間公司集資可以有很多不同的方法，包括向銀行借錢，或者發行新股配售給投資大戶，供股往往是下策，因為直接搞到小股東，要向小股東攞錢，小股東唔供股，股權又會攤薄，日後派息都縮水。
即使想減債，為何不用配售股份來籌錢呢？基金可以發行新股賣俾大戶，這會否因為擔心市場上冇乜投資大戶想要？
2. 為何要大折讓？
依家是七折向小股東賣股份，為何打了這麼大的折扣？真的擔心股東唔上釣？以往是二三線股才大折讓供股。
3. 何為是這個時候？
市場普遍預期下半年息口有機會見頂或回落，為何不早一些發售新股？領展過往借了一輪錢，依家息口或快到頂時才大幅減債🤔，管理層的想法真的想了解下。
投資REITs，無非想穩穩陣陣等收息，但這家基金減咗派息仲要向股東伸手攞錢，領展股價無可避免大插水，而這個行動傷了股民的心之外，它的行動肯定都令投資大戶信心大打折扣，香港本土股票逐漸被邊緣化，港股主要炒中資股，而這家龍頭收息股出了這一招，真的誰會有很大興趣去投資呢？