股票市場有數以千計嘅公司任選擇，有人專揀一啲高息股，穩穩陣陣等收息，有人專門等跌市才撈貨，有人數口精，唔平唔買，入市投資策略可謂五花八門，今次拆解一下呢啲熱門投資攻略。
5種投資攻略
1 穩陣型：買收息股
呢類股民主要係食息一族，專揀有穩定股息派嘅公司，以收息為目標，所以選股方面，要留意一下公司的派息是否吸引，同時公司過去的收入是否年年賺錢，有條件年年保持派息有增無減。
值得注意的是呢類股票派息穩定，但股價的增長動力未必太大。有錢用嚟派息唔係投資新業務，都預咗股價升得唔多啦！
2. 價值型：只買平貨
呢類股民數口最精，專揀一啲被市場低估的股票來投資，希望有朝一日股票的價值被人發現，身價可以大翻身。
要識得買平貨，首先要識得計數，懂得評估公司的估值，是否真的很便宜，另一方面亦都要注意的就是，這類股票多屬於一些冷門或悶股，投資時要有耐性。
3. 大路型：看大環境買龍頭股
呢類入市方法相信是比較普遍，同時亦較簡單，如果睇好一個行業，就從藍籌股當中揀出最大、最熱門嘅一隻。 因為藍籌股往往是一個行業的領袖，喺市場上有相當的地位和競爭力。一個行業做得好，龍頭企業亦都唔會差得去邊，例如睇好科技股，可能好多人想起蘋果公司、Amazon等等。
4. 進取、敏捷型：趁突發事故出擊
市場突變、政府突然推出新政策，或個別公司出現股權變動，呢啲偶發事件令一家公司的投資價值浮現出來， 進取型的股民自然會主動出擊去撈貨。
例如香港早年放寬來港的自由行，令到酒店、金飾股等等成為搶手貨，造就六福等手飾製造商變身成為十倍股。
5. 投資敢死隊：危機投資
市場氣氛轉壞股市大跌，有啲人勇字當頭，變得特別貪婪，趁人們慌忙走避時，或個別的壞消息令到公司股票被人恐慌性拋售，這類股民敢於冒風險趁低吸納。
不過，食得鹹魚抵得渴，這類方法的風險也會較高，投資前要識得做好風險管理。
結語
股票市場又大又複雜，唔同類型嘅公司，或者在唔同嘅環境下，提供唔少投資機會，前題是大家要因應自己嘅目標、風險承受能力，以及對市場的認識，選擇適合自己的投資策略，咁就成功嘅機會在望。