一直覺得投資盈富基金不是想像中容易，而事實上，投資另外一隻熱門的ETF A50中國基金(2823或2822)，比盈富基金更難賺錢，筆者買過好多次，多數都係損手收場。
ETF是筆者喜歡的投資工具，當見到整體市場氣氛好，又懶懶地唔想逐隻股票揀，就會用大包圍策略，買入一隻ETF。盈富基金如是，A50都一樣。
(文章選輯自我們Patreon的內容)
A50對經濟敏感度高
A 50中國基金投資的內容是中國最大的50隻股票， 這些股票以金融股佔較大比重，這些都是經濟敏感度比較高的股份，如果內地經濟有好消息，這隻ETF就會做得好、升得快。 同樣地反映內地經濟的亦有另類熱門ETF，就是滬深300指數的基金(有多間不同基金公司推出)，不過一向以來，筆者會比較喜歡投資A50中國基金。
A50與滬深300的分別是，A50是追蹤50隻規模最大的基金，當中較側重金融股，佔比重超過三成半，換言之，這隻ETF經濟敏感度高比較高，升起上嚟會比較快，跌時就比較急，適合較短線的投資。
滬深300指數ETF追蹤的是上海及深圳300隻股份，投資範圍比較廣，覆蓋比較全面。走勢相對比較平穩，適合較長線的投資。
內地的經濟增長速度大不如前，經濟逐步轉型，由出口型走向內需，由低端產品走向高增值發展，過程中有起有落。以往作為世界工廠，勞動力需求大，加上還要加大城鎮化， 起路、起橋、起屋等固定資產投資不斷增加，令到經濟增長動力強勁。不過，各地政府大灑金錢大興土木，企業不少又過度借貸，換來是一蘿蘿的債務問題，遇上經濟增長減速。問題進一步浮現。
政策轉向難捉摸
另方面，近年政策方向話變就變，好難估得佢到，令到投資風險上升，股市做好一段時間，突然熱錢一走，升勢無以為繼。此外，股市向好又常遇到政策的轉變，好似向股市撥了一盤冷水，就好似近幾個月以來的情況。
筆者每次買A50 ETF都打算作一個短線投資，好多時因為入市後想睇定啲先，最終因為市場熱錢走得快或者風向轉得太快走唔切，結果損手離場。以往多次經驗試過，短炒唔得不如長揸啦，但結果都沒有改善😫。
中國股市好多時好似一眾中資銀行股一樣， 到佢上升的時候，往往都是水尾，全球熱錢尋找出路、追落後，帶動內地及香港股市升一輪，資金一走股市又腳軟。
總括來說，今時今日用大包圍買香港及中國的ETF，時機的掌握要好好，股市經常升完又回，跌咗又反彈多少少，跟住無以為繼，長線投資真的要看大家的耐力，都係一句：宜短不宜長，要審時度勢，夠果斷才有好收成。