盈富基金(2800)及滙豐(0005)一向都是香港散戶的至愛， 或較為熟悉的股份，兩隻股份走勢其實差異頗大，積弱多時的滙豐今年走勢回勇了，而盈富繼續波幅大過升幅，要投資的話，這兩隻股票可以點樣揀？
了解盈富及滙豐
盈富基金是追蹤恒生指數的ETF，投資盈富即是買晒香港的大藍籌股，這些主要是中資大企業佔多數， 特別是金融及科技股，換言之，睇好盈富即是睇好內地的經濟。
滙豐是香港上市的國際銀行，也是銀行股的龍頭企業， 銀行股對經濟敏感度相當高，經濟好的時候，銀行股會做得好，而滙豐主要市場在香港以及英國，換言之，睇好滙豐就等於睇好全球，特別是香港和英國的經濟。
兩隻股票的回報表現並不相同，有沒有錢賺、賺多少，取決於入市時機，當中國經濟好的時候，盈富就會造好，買滙豐要睇銀行股的經營環境，經濟好、息口上升，銀行股就有運行。
回顧近幾年兩隻股份表現，用5年作為一個投資期，未計股息，盈富基金的股價上升了38%，滙豐則跌了3.8%。2年表現方面，盈富股價升了3%，而滙豐就下跌25%。不過今年情況開始逆轉了。盈富回報有4%(截至 24/5/2021)，滙豐則反彈20%。所以不同時期的投資回報是不同，因為市場環境轉變了。
事實上如果大家有投資美股，五年來追蹤標普500指數的ETF，如SPY，回報已經有97%，兩年的回報亦有47%，今年以來也上升10%日，表現好過盈富基金。
圖： 滙豐、盈富及SPY近兩年股價表現
滙豐因為英國脫鈎問題，加上2020年肺炎疫情重挫經濟，業績大受打擊，與此同時停止了股份回購和派息，令到股價更加雪上加霜。隨着經濟逐漸回復正常，加上英國脫鈎困擾淡化，英國疫情緩和令到經濟從谷底反彈，這都有利滙豐的經營。近期市場擔心通脹升溫，可能令息口上升，亦都為滙豐帶來有利的環境。
至於盈富基金方面，就要看中國的經濟，上星期中國話會收緊四個大範疇的行業(教育、醫療、科技平台企業及虛擬貨幣)，這都會影響香港上市的中資股，包括近年帶動升市的火車頭：科技股。所以以現時投資環境看，滙豐暫時來看可望看高一線，不過如果經濟環境不似預期，滙豐強勢會否曇花一現就要拭目以待。